Die Noord-Kaapse Departement van Landbou, Omgewingsake, Landelike Ontwikkeling en Grondhervorming het sy Comprehensive Agricultural Support Programme, CASP, se boeregradueringsprogram in die Pixley ka Seme-distrik afgesluit.
Die provinsiale LUR vir Landbou, Newrene Klaaste, het die boere gelukgewens en beklemtoon dat die opleiding slegs die begin is. Sy sê boere moet ná graduering steeds toegang hê tot voorligtingsdienste, mentorskap, sake-ontwikkeling, markte en inligting oor befondsingsgeleenthede.
Die departement het gedurende die 2024/25-boekjaar sowat 3,5 miljoen rand vir geakkrediteerde en nie-geakkrediteerde landbouopleiding bestee. Altesaam 2 295 begunstigdes het opleiding ontvang, waarvan 613 aan geakkrediteerde programme deelgeneem het.
Die opleiding het onder meer pluimveeboerdery, hidroponika, grondvrugbaarheid, gewasbeskerming, dieregesondheid en -teling, infrastruktuurinstandhouding en sweiswerk ingesluit.
Klaaste sê toekomstige ondersteuning moet ook rekening hou met uitdagings soos watertekorte, veranderende weerstoestande, dieresiektes, stygende insetkoste en beperkte toegang tot markte.
