Die SAPD in Namakwa het kommer uitgespreek oor ’n toename in kontakmisdade, insluitend aanranding, poging tot moord en seksuele aanranding. Distrikskommissaris, Brigadier Schalk Andrews, waarsku dat alkoholmisbruik dikwels tot aggressie en gewelddadige konfrontasies bydra. Hy doen ’n beroep op gemeenskappe om verantwoordelik op te tree, konflikte vreedsaam op te los en geweld aan te meld. Met die naderende 16 Dae van Aktivisme-veldtog word inwoners ook aangemoedig om vroue en kinders teen mishandeling te beskerm en saam veiliger gemeenskappe te bou.