Die waarnemende hoof van die Noord-Kaapse gesondheidsdepartement, dr. Dion Theys, moet summier afgedank word ná sy skuldigbevinding en vonnisoplegging in die gespesialiseerde handelshof in Kimberley gister. Theys is skuldig bevind aan die oortreding van artikel 86(1) van die Wet op Openbare Finansiële Bestuur nadat hy drie huurooreenkomste ter waarde van meer as R13 miljoen met JP Hugo Trading aangegaan het sonder om die wetlike voorskrifte en aankoopprosesse te volg.   Theys is gevonnis tot 'n boete van R150 000 of drie jaar se tronkstraf, waarvan R100 000 of twee jaar opgeskort is op voorwaarde dat hy nie weer in daardie tyd aan dieselfde misdryf skuldig bevind word nie. Zamani Saul het oor die afgelope paar jaar, toe hy op verskeie geleenthede deur die DA gevra is oor dié kwessie, probeer om die erns van oortredings van finansiële wetgewing te minimaliseer.