President Cyril Ramaphosa het gisteraand bekend gemaak dat die nasionale en provinsiale verkiesings hierdie jaar op 29 Mei sal plaasvind. Die datum in Mei val binne die tydsraamwerk wat die meeste politieke ontleders voorspel het en stem ook ooreen met datums van vorige verkiesings wat in April, Mei of Junie gehou is. Die aankondiging is deur die meeste politieke partye verwelkom. Dit beteken dat politieke partye nou in alle erns met hul onderskeie verkiesingsveldtogte kan begin en weet waarvoor hulle beplan. Die president sê die datum sal binnekort amptelik in die Staatskoenrant gepubliseer word. Suid-Afrikaners moet kennis neem dat die geleentheid om te registreer om te stem tot ʼn einde kom sodra die datum in die Staatskoerant verskyn.