Die DA in die Noord-Kaap het ‘n formele klag by die Suid-Afrikaanse Menseregtekommissie ingedien teen die Gamagara-munisipaliteit omdat hy versuim het om ‘n rioolafvoer te ontblokkeer. Die drein veroorsaak ‘n ondraaglike stank en hou gesondheidsrisiko’s in vir laerskoolleerders in Welgelee. Die verstopte rioolafvoer het in Maart verlede jaar ‘n rou rioolrivier gevorm. Die DA sê onder sy burgemeesterskap was daar konsekwente bestuur van die drein, wat die verdere storting van riool verhoed het. Die DA se Neville Koikoi sê die party sal voortgaan om die situasie te monitor en te verseker dat die munisipaliteit aanspreeklik gehou word en die rioolafvoer permanent reggemaak word.