Die Noord-Kaapse polisie ondersoek die oorsaak van ’n busongeluk wat gisteroggend in die Noord-Kaap plaasgevind het. ’n Bus wat van Kaapstad na Zimbabwe op pad was, het om 04:30 op die N1 tussen Richmond en Hanover omgeslaan.  Die tweede ongeluk het omstreeks 09:00 plaasgevind toe ’n Toyota Quantum met twee manlike insittendes agter in ’n ambulans vasgery het wat na die ongelukstoneel gestuur is. Aanvanklike verslae dui daarop dat die Copperbelt-busbestuurder beheer oor die voertuig verloor het waarin sowat 20 passasiers vervoer is voordat dit omgeslaan het. “Die vroulike ambulansbestuurder is beseer en haar manlike assistent het ongedeerd daarvan afgekom. Albei die manlike insittendes van die Quantum het slegs ligte beserings opgedoen,” het die Noord-Kaapse polisiewoordvoerder, lt.kol. Sergio Kock, gesê.