Die Noord-Kaapse regering sê hulle gaan voort met humanitêre hulpverlening aan die geaffekteerde gesinne weens onlangse slegte weerstoestande in twee distrikte. Dit volg op erge weerstoestande op 28 Desember wat huise en eiendom in die Pixley Ka Seme- en John Taola Gaetsewe-distrikte beskadig het. Die LUR vir Samewerkende Regering, Menslike Nedersettings en Tradisionele Sake, Bentley Vass, sê hy kan bevestig dat gesinne terug is in hul huise, aangesien die meeste huise nou weer droog is. Intussen gaan President Cyril Ramaphosa volgende week die John Taola Gaetsewe-distriksmunisipaliteit in Noord-Kaap besoek om ‘n behuisingsprojek van stapel te stuur. Die bekendstelling vind volgende week Donderdag in Kimberley plaas. Die munisipaliteit sê dit is die grootste behuisingsprojek in die provinsie met ‘n bedrag van een miljard rand. ​