Die veeboere van Eksteenfontein in Wyk een was bevoorreg om die ontvangers vir Dieregesondheidspakke te wees om hul vee 'n hupstoot te gee en gesond te hou. In pogings om klimaatsverandering te beveg, het die Ritchersveld Plaaslike Munisipaliteit saam met die Departement van Landbou in die Namakwa-distrik dit goed geag om uitdagings wat diè sektor in die gesig staar, aan te spreek. Volgens die opgestelde klimaatveranderingsplan 2021/50-dokument sal die distrik na verwagting deur hoër jaarlikse gemiddelde temperature geraak word, wat water- en voedselsekuriteit nadelig sal beïnvloed. Verdamping sal waarskynlik ook toeneem en landbou-uitsette kan verminder. Burgemeester Cornell Knoph het sy dankbaarheid teenoor die Departement uitgespreek vir die ondersteuning aan boere in die Richtersveld Munisipale Jurisdiksie.