In ‘n poging om kontak- en geweldsmisdade in geïdentifiseerde brandpunte hok te slaan, het die Noord-Kaapse polisie ’n weeklange hoëdigtheid-operasie van stapel gestuur. Bekend as Operasie Shanela, het diè multi-dissiplinêre operasie van Maandag 15 April tot Sondag 21 April geduur. Volgens provinsiale polisiewoordvoerder, luitenant-kolonel Sergio Kock, het die operasie 'n reeks ontwrigtende aksies behels, insluitend voertuigkontrolepunte (VCP's), stop- en deursoekings, voet- en voertuigpatrollies, nakomingsinspeksies, en pogings om die smokkel van dwelms en ander kommoditeite hok te slaan. Regoor die Noord-Kaap het voertuigkontrolepunte en padblokkades daartoe gelei dat 2 270 voertuie en 4 617 individue voorgekeer en deursoek is. Die polisie het ook talle voldoeningsinspeksies by tweedehandse handelaars, skrootwerwe, herwinnings, private sekuriteitsfirmas, vuurwapenhandelaars, formele en informele besighede, plase en myne uitgevoer.