Hoërskool Aggeneys se graad 12’s is in Kaapstad vir die opvoering van hul voorgeskrewe boek. Die boek se naam is Onderwêreld en is geskryf deur Fanie Viljoen. Greg Owen is die hoofseun van ’n privaat seunskool wanneer Eckardt Wilken, ’n buitestander, in matriek by hulle aansluit. Reeds met die inisiasie van nuwelinge vorm ’n band tussen die twee seuns. Eckardt erken dat hy ’n voortreflike rekenaar-hacker is en lei Greg in die geheime van die onderwêreld in wat hom, onwillekeurig, in ’n gevaarlike avontuur intrek. Met Eckardt se skielike en geheimsinnige verdwyning begin Greg alles wat hy voorheen as vanselfsprekend aanvaar het, bevraagteken. Die onderwêreld ken sy naam en roep hom om te kom speel. Die skrywer het uitvoerige navorsing gedoen oor kuberkraking en dit, tesame met ’n goed geskrewe en gekonseptualiseerde storielyn, maak vir spannende leesstof.