Die Namakwa Distriksmunisipaliteit gaan 'n lewensbelangrike gesprek oor Tienerswangerskapbewustheid by Matjieskloof Primêr op 12 September 2024 van 07:30 tot 09:30 hou. “Kom ons bemagtig ons jeug om hul drome na te jaag en hul toekoms te verseker,” het die distrik gesê. Tienerswangerskap is 'n komplekse kwessie met beduidende sosiale, ekonomiese en gesondheidsimplikasies. Dit kan die jong ouers se opvoedkundige en loopbaangeleenthede beïnvloed, en het ook 'n breër impak op hul gesinne en gemeenskappe.  In die tussentyd het die Uitvoerende burgemeester mnr. Mervin Cloete sy diepe hartseer uitgespreek oor die tragiese ongeluk wat Maandag op   die Van Rhynspas plaasgevind het. Dit het gelei tot die verlies van 10 lewens en vele wat beserings opgedoen het. Namens die Namakwa distriksmunisipaliteit en gemeenskap betuig hy sy innige meegevoel met die bedroefde families en wens die beseerdes 'n spoedige herstel toe. Burgemeester Cloete beklemtoon die belangrikheid van gemeenskapsondersteuning en eenheid gedurende hierdie moeilike tyd, en moedig almal aan om krag en deernis te bied aan diegene wat geraak word.