’n 32-jarige man is tot 20 jaar direkte gevangenisstraf gevonnis nadat hy in die Springbok Streekshof skuldig bevind is aan die verkragting van ’n minderjarige.
Die voorval het in Februarie vanjaar in Vaalwater naby Springbok plaasgevind. Die man is op 21 Februarie in hegtenis geneem en het sedertdien in aanhouding gebly.
Die ondersoek het mediese bewyse en getuieverklarings ingesluit en is deur luitenant-kolonel Wynoma Love van die Springbok-eenheid vir Gesinsgeweld, Kinderbeskerming en Seksuele Misdrywe, oftewel FKS, behartig.
Die hof het bevind dat daar omstandighede was om van die voorgeskrewe lewenslange minimum vonnis af te wyk en het hom 20 jaar tronkstraf opgelê.
Die man is ook onbevoeg verklaar om ’n vuurwapen te besit en om met kinders te werk. Sy naam sal verder op die Nasionale Register vir Seksuele Oortreders geplaas word.
Hy het reeds in 2023 ’n vorige skuldigbevinding vir die seksuele aanranding van ’n ander minderjarige gehad, waarvoor hy ’n geheel opgeskorte vonnis ontvang het.
