Die Springbok-streekhof in die Noord-Kaap het gister ’n 26-jarige man tot ses jaar direkte tronkstraf vir statutêre verkragting gevonnis. Abongile Sibekwa is in 2021 in hegtenis geneem nadat hy ‘n 14-jarige meisie in Carolusberg verkrag het. Sibekwa en die slagoffer het by dieselfde blok huurwoonstelle gebly en die beskuldigde het die slagoffer na sy kamer toe genooi om seksuele omgang met haar te hê. ‘n Polisiewoordvoerder, sersant Timothy Sam, sê die slagoffer se ma het daarvan bewus geraak en die saak by die polisie aangemeld.