Die Calvinia-streekhof in die Noord-Kaap het twee mans tot onderskeidelik 20 en 18 jaar gevangenisstraf gevonnis vir die verkragting van ‘n minderjarige. Janere Rossouw en Randall Snyders is in 2022 in hegtenis geneem vir die verkragting van ‘n 14-jarige meisie. Ondersoeke toon dat die slagoffer van ‘n spaza-winkel op pad huis toe was toe sy die twee ontmoet het. Rossouw en Snyders het haar vergesel en haar later in ‘n veld ingesleep waar hulle haar om die beurt verkrag het. Die polisiewoordvoerder, luitenant-kolonel Sergio Kock, sê die polisie verwelkom die vonnisoplegging.