Met die oog op prioriteitsmisdade, het die Noord-Kaapse polisie hierdie week hoëdigtheid-operasies regoor die provinsie uitgevoer onder die vaandel van Operasie Shanela. Die operasie het gelei tot die inhegtenisneming van 179 verdagtes, insluitend 121 gesoekte verdagtes wat die polisie ontduik het. Die verdagtes, volgens provinsiale polisiewoordvoerder, kolonel Cherelle Ehlers, is gesoek in verband met ernstige misdade soos moord, aanranding, geslagsgebaseerde geweld,  dwelmverwante misdrywe, roof en poging tot moord. Die operasie het behels dat multi-dissiplinêre spanne padblokkades, voertuigkontrolepunte en hoësigbaarheidspatrollies regoor die provinsie uitgevoer het, waartydens 6 195 individue en 3 015 voertuie voorgekeer en deursoek is.