In hul pogings om kriminele aktiwiteite hok te slaan, het die polisie in die ZF Mgcawu (ZFM)-distrik beslag gelê op vermeende onwettige sigarette ter waarde van nagenoeg R4 miljoen in Upington.
Op Vrydag, 14 Junie, het die Upington-grenspolisie en K9-eenhede, wat op ‘n wenk opgetree het, toegeslaan op ‘n plaaslike winkel wat verdink word van die verkoop van onwettige sigarette.
Sersant Omphile Masegela, ‘n woordvoerder van die Noord-Kaapse polisie, het berig dat beamptes met inspeksie van die perseel ‘n versteekte stapel sigarette in ‘n stoorkamer ontdek het.
Die winkeleienaar kon geen fakture vir die goedere lewer nie, wat gelei het tot die konfiskering van 153 meesterkiste sigarette, ter waarde van ongeveer R 3,901,500.
’n Ondersoek is geopen om die saak verder te ondersoek en die oorsprong van die vermoedelike onwettige handelsware te bepaal.
