Die LUR vir Finansies, Ekonomiese Ontwikkeling en Toerisme, Venus Blennies-Magage, vorm deel van die Suid-Afrikaanse afvaardiging wat die Wêreldwaterstofberaad en -uitstalling 2026 in Rotterdam, Nederland, bywoon.
Die beraad word beskou as een van die wêreld se belangrikste platforms vir gesprekke oor groen waterstof en skoon energie.
Tydens die geleentheid het Blennies-Magage openingsrede gelewer oor die Projekontwikkelingsstandaard (PDS), ’n instrument wat ontwikkel is om die gereedheid en ontwikkeling van projekte binne Suid-Afrika se groen waterstofekonomie te beoordeel en te versterk.
Volgens die LUR bied die PDS belangrike insig aan internasionale beleggers, finansiële instellings, tegnologievennote en afnemers oor die vordering van projekte in Suid-Afrika se groen waterstofpyplyn.
Die standaard is ook daarop gemik om projekte te ondersteun in hul voorbereiding vir finale beleggingsbesluite en implementering.
Blennies-Magage het verder deelgeneem aan ’n paneelbespreking van die Verenigde Nasies se Organisasie vir Industriële Ontwikkeling (UNIDO), waar wêreldleiers en bedryfskundiges gesprek gevoer het oor die rol van groen waterstof in industrialisering, werkskepping en volhoubare ekonomiese groei.
Die beraad het die Noord-Kaap se potensiaal as ’n toekomstige sentrum vir groen energieontwikkeling verder beklemtoon.
Die provinsie beskik oor wêreldklas son- en windhulpbronne wat as sleutel tot toekomstige beleggings, industriële ontwikkeling en werkskepping beskou word.
Besprekings tydens die sessie het ook gefokus op die vordering van die sogenaamde “3 Kaapse samewerking” en Suid-Afrika se gereedheid om van beplanning en uitvoerbaarheid na implementering van groen energieprojekte oor te gaan.
