Die Noord-Kaapse Provinsiale Wetgewer het Dinsdag, 30 Junie 2026, sy 30 Jaar van die Grondwet Gemeenskapsuitreikprogram voortgesit as deel van die Neem die Wetgewer na die Mense-program, wat daarop gemik is om die Wetgewer nader aan gemeenskappe te bring deur direkte openbare deelname.
Tydens die uitreikprogram het inwoners die geleentheid gekry om verskeie uitdagings wat hul daaglikse lewe raak, onder die aandag van die Wetgewer te bring.
Van die kwessies wat geopper is, sluit in skoolveiligheid, tienerswangerskap, leerderuitval, onwettige sjebiens, probleme met behuisingsregistrasie, waterinfrastruktuur en toegang tot basiese dienste.
Die openbare gesprek is deur lid van die provinsiale wetgewer (LPW) Priscilla Isaacs gefasiliteer, wat verseker het dat gemeenskapslede op ‘n gestruktureerde wyse hul bekommernisse en voorstelle kon deel.
LPW Harold McGluwa, voorsitter van die Staande Komitee oor Grondwetlike Sake, Petisies en Openbare Deelname, het die belangrikheid van openbare deelname beklemtoon.
Hy het inwoners aangemoedig om van die Wetgewer se petisieproses gebruik te maak en daarop gewys dat die Wetgewer streekkantore in al vyf distrikte het om gemeenskappe beter te bedien.
Die ZF Mgcawu-streekskakelbeampte, mnr. Ticci Zweni, is ook aan die gemeenskap voorgestel om plaaslike toegang tot die Wetgewer se dienste in Upington verder te versterk.
In haar slottoespraak het die Speaker van die Noord-Kaapse Provinsiale Wetgewer, Newrene Klaaste, die rol van die Wetgewer as ‘n instelling van openbare verteenwoordiging herbevestig.
Sy het gesê die uitreikprogram word gelei deur die vraag: “Wat sê ons mense?”
Klaaste het inwoners verder aangemoedig om deur wykskomitees en ander plaaslike strukture betrokke te raak by behuisingsaangeleenthede en ander ontwikkelingskwessies, terwyl sy ‘n beroep op gemeenskappe gedoen het om saam te werk in die gees van Ubuntu.
