Hoërskool Concordia se Oral History-span het die afgelope naweek aan die provinsiale Oral History-kompetisie in Kimberley deelgeneem, waar hulle deel gevorm het van die Namakwa-span wat die distrik op provinsiale vlak verteenwoordig het.
Die leerders is deur juf. Monique Engelbrecht vergesel, wat hulle gedurende die kompetisie ondersteun en begelei het.
Een van die hoogtepunte vir Hoërskool Concordia was die uitstekende prestasie van Zeenith Cloete, wat ’n skitterende tweede plek in die Young Historians-kategorie behaal het.
Cloete het die beoordelaars toegespreek oor die ontstaan van Suid-Afrika se nuwe Grondwet in 1996, ’n belangrike gebeurtenis in die land se geskiedenis en demokratiese ontwikkeling.
Jo-Ann October het ook in die Young Historians-kategorie deelgeneem.
Haar onderwerp het gefokus op die Waarheids- en Versoeningsproses in Suid-Afrika, ’n belangrike hoofstuk in die land se poging om die nalatenskap van apartheid en die menseregteskendings van die verlede te hanteer.
In die Poems-kategorie het Mia Muller Hoërskool Concordia verteenwoordig met Western Cape: “Good Hope”.
Siano Strauss het op sy beurt in die Storytelling-kategorie meegeding met “Food Shortage and Malnutrition”.
Die skool het sy trots uitgespreek teenoor al die leerders wat bereid was om hul kennis, vaardighede en stories op provinsiale vlak te deel.
Hul deelname is ’n bewys van die harde werk, voorbereiding en toewyding wat in die Oral History-program belê word.
Die Namakwa-span het bestaan uit leerders van verskillende skole in die distrik.
Hoërskool Concordia se deelnemers het saam met leerders van Hoërskool Namakwaland en Hoërskool Steinkopf die Namakwa-span gevorm.
Die skole is gelukgewens met hul deelname en met die wyse waarop hulle die Namakwa-distrik met trots op provinsiale vlak verteenwoordig het.
Die Oral History-program bied aan jongmense veel meer as bloot die geleentheid om aan ’n kompetisie deel te neem.
Dit skep ’n waardevolle platform waar leerders hul geskiedenis kan ondersoek, na die verhale en ervarings van ander mense kan luister en ’n dieper begrip kan ontwikkel van waar hulle vandaan kom.
Deur aan Oral History deel te neem, kry jongmense ook die geleentheid om stories wat andersins verlore kan gaan, te dokumenteer en aan toekomstige geslagte oor te dra.
Dit help om die geskiedenis en erfenis van gemeenskappe lewendig te hou en moedig jong mense aan om ’n aktiewe rol in die bewaring van hul plaaslike en nasionale geskiedenis te speel.
Hoërskool Concordia hoop dat nóg meer leerders in die toekoms by hierdie waardevolle program betrokke sal raak en hul stemme sal gebruik om die stories van ons mense en ons gemeenskappe lewendig te hou.
