Die LUR vir Landbou, Omgewingsake, Landelike Ontwikkeling en Grondhervorming, Lebogang Motlhaping, het saam met die Departementshoof, mnr. Monakali, en die Uitvoerende Burgemeester van die Khâi-Ma Plaaslike Munisipaliteit, raadslid Estella Cloete, met boere in Pofadder vergader om landbou-uitdagings en ondersteuningsgeleenthede te bespreek.
Die gesprek het gefokus op grondtoegang, CASP-befondsing, waterinfrastruktuur, droogteverligting, veeartsenykundige dienste, boeregereedheid en die versterking van vennootskappe binne die landbousektor.
Boere het die geleentheid gehad om hul uitdagings direk met die Departement te bespreek.
Die Departement het sy verbintenis tot die ondersteuning van boere herbevestig en bestaande inisiatiewe, waaronder beleggings in veewaterinfrastruktuur, droogtehulp, veeartsenykundige ondersteuning en opleidingsprogramme, uitgelig.
Motlhaping het boere aangemoedig om beskikbare ondersteuningsprogramme te benut en saam te werk om ‘n veerkragtige, produktiewe en volhoubare landbousektor in die Noord-Kaap te bou.
