Radio Nfm berei voor vir ‘n groot musikale gebeurtenis wat geloof, gemeenskap en talent in die kollig plaas. Die stasie sal op Saterdag, 3 Mei 2025, sy tweede Gospel Extravaganza aanbied by die Okiep Rec Club, met die immer gewilde Lekker Crew en verskeie plaaslike kunstenaars wat die verhoog sal deel.
Die geleentheid begin om 18:00, en beloof om ‘n aand van geestelike inspirasie en energieke lofprysing te wees. Die Lekker Crew, bekend vir hul jeuggerigte en kragtige boodskappe deur musiek, sal die gehoor saam met plaaslike talente betrek in ‘n viering van geloof en eenheid.
Kaartjies kos R100 vir volwassenes, R40 vir studente en net R20 vir kinders – ‘n toeganklike geleentheid vir die hele gesin.
Volgens Radio Nfm wil die Extravaganza hoop bring en ‘n gevoel van samehorigheid skep in ‘n tyd waar baie mense dit nodig het.
Die gemeenskap word aangemoedig om vroeg hul plekke te bespreek en saam deel te wees van hierdie hoogtepunt op die Namakwa-geestelike kalender.
