Die multidissiplinêre Operasie Vala Umgodi-span, wat uit lede van die SAPD en SANW bestaan, het vier mans in hegtenis geneem vir onwettige mynbou en beslag gelê op mynboutoerusting in die Kleinzee-omgewing.
Hierdie aksie is deel van ‘n intelligensie-gedrewe operasie in die Namakwa-distrik.
Sersant Merapelo Pilane, woordvoerder van die provinsiale polisie, het bevestig dat die span Saterdag (23/09/2024) vier mans, tussen die ouderdomme van 32 en 44, suksesvol aangekeer het op aanklagte van onwettige mynbou en betreding in die Kleinzee-gebied.
Die arrestasies het gevolg op intensiewe intelligensie-gedrewe operasies wat daarop gemik was om onwettige mynaktiwiteite binne die myneiendom te teiken.
Tydens die operasie het owerhede ook beslag gelê op verskeie mynwerktuie wat vermoedelik in die onwettige aktiwiteite gebruik is.
Sersant Pilane het beklemtoon dat hierdie ontwrigtende aksies, onder die vaandel van Operasie Vala Umgodi, in die distrik sal voortduur as deel van voortdurende pogings om onwettige mynbou uit te roei.
