Die Namakwa Distriksmunisipaliteit het Mandeladag op 17 Julie 2026 op ‘n besondere wyse herdenk deur die lewens van senior burgers by die Concordia Diensentrum te verryk.
Die inisiatief is gelei deur die Uitvoerende Burgemeester, raadslid Alinda Beukes, wat die geleentheid ook gebruik het om haar verjaarsdag saam met die inwoners van die sentrum te vier.
Die program is ondersteun deur die Speaker van die Namakwa Distriksmunisipaliteit, raadslid Gillian Pieters, ander raadslede en munisipale amptenare, wat hul tyd en energie afgestaan het om die gemeenskap te dien in die gees van Nelson Mandela se nalatenskap van diensbaarheid en omgee.
As deel van die dag se aktiwiteite het deelnemers die gemeenskapsgroentetuin by die diensentrum herstel en skoongemaak om ‘n gesonder en meer volhoubare omgewing vir die inwoners te skep.
Die projek is daarop gemik om voedselsekerheid te bevorder en die tuin as ‘n waardevolle gemeenskapshulpbron te behou.
Die munisipaliteit het ook kombersies aan die bejaarde inwoners geskenk om hulle gedurende die koue wintermaande warm te hou.
Die skenking is met groot waardering ontvang en het die dag se boodskap van deernis, solidariteit en ondersteuning verder beklemtoon.
Volgens die Namakwa Distriksmunisipaliteit weerspieël die inisiatief hul voortdurende verbintenis tot gemeenskapsontwikkeling en die ondersteuning van kwesbare groepe.
Deur betekenisvolle dade van diens het die munisipaliteit hulde gebring aan Nelson Mandela se oproep dat elkeen ‘n verskil kan maak deur tyd aan ander af te staan.
