Die A.J. Bekeur Biblioteek in die Richtersveld Munisipaliteit het sy getroue lesers vir die maand Junie vereer as erkenning vir hul verantwoordelike gebruik van biblioteekmateriaal en hul bydrae tot die bevordering van ‘n leeskultuur in die gemeenskap.
Die biblioteek het die volgende lesers vir hul voorbeeldige uitleengewoontes en sorg vir biblioteekboeke erken: Keezia van Jaarsveld in die Kinderafdeling, Wilmarr Monster en Magotia Mampuru in die Tienerafdeling, Jeniffer Mister en Petrus Farmer in die Volwasse Afdeling, en Monica Britz in die Bejaarde Afdeling.
Volgens die biblioteek speel hierdie lesers ‘n belangrike rol deur boeke met groot sorg te hanteer en dit betyds terug te besorg.
Dit verseker dat die biblioteek se versameling doeltreffend sirkuleer en dat meer lede van die gemeenskap toegang tot leesmateriaal kry.
Die A.J. Bekeur Biblioteek het die bekroondes geloof vir hul liefde vir lees en hul respek vir biblioteekmateriaal.
Die instelling beskryf hulle as ware ambassadeurs van die biblioteek wat ander inspireer om die waarde van boeke en lees te ontdek.
Die inisiatief vorm deel van die biblioteek se voortdurende pogings om geletterdheid te bevorder en ‘n leeskultuur in die Richtersveld-gemeenskap te versterk.
