Die Noord-Kaapse premier, dr. Zamani Saul, het die verbeterde oudituitkomste van provinsiale departemente, soos verlede week deur ouditeur-generaal Tsakani Maluleke bekendgemaak, verwelkom.
Hy het staatsentiteite aangemoedig om skoon oudits te handhaaf.
Die premier se woordvoerder, Naledi Gaosekwe, het ‘n “beduidende verbetering” in die ouditresultate beklemtoon en opgemerk dat die provinsie agt skoon oudits behaal het.
“Dit is die hoogste getal wat tot dusver aangeteken is, ‘n verbetering van die twee skoon oudits in 2019, waar daar nege ongekwalifiseerde bevindings en vier gekwalifiseerde ouditmenings was.
Daar was egter een geval van regressie by die Departement van Paaie en Openbare Werke,” het Gaosekwe gesê.
Sy het ook daarop gewys dat geen ongemagtigde uitgawes tydens die ouditsiklus in die provinsie aangeteken is nie.
“Dit is ‘n duidelike aanduiding van die provinsiale regering se verbintenis tot die verbetering van aanspreeklikheid en deursigtigheid in alle departemente.”
Gaosekwe het bygevoeg dat van departemente verwag word om hul ouditaksieplanne op ‘n kwartaallikse basis aan die uitvoerende komitee voor te lê.
“Dit is die aanspreeklikheidsmeganisme wat geïmplementeer sal word om te verseker dat ‘n kultuur van aanspreeklikheid en gevolgbestuur gevestig word,” het sy gesê.
Opsomming van departemente: Ses skoon oudits, drie ongekwalifiseerd met bevindings, drie gekwalifiseerde oudits.
Opsomming van openbare entiteite: Twee skoon oudits, ses ongekwalifiseerd met bevindings, een gekwalifiseerde oudit.
