Die Noord-Kaap het Vrydag, 17 Oktober 2025 saam met die nasie ’n diep betekenisvolle oomblik van herdenking beleef toe die oorskot van Khoi- en San-voorouers vanaf die Hunterian Museum in Skotland na Suid-Afrika terugbesorg is.
Die seremonie, wat by die Iziko Suid-Afrikaanse Museum in Kaapstad gehou is, het ’n historiese mylpaal verteenwoordig in die proses om eer en menswaardigheid aan gemeenskappe te herstel wat vir eeue deur koloniale uitbuiting geraak is.
Premier van die Noord-Kaap, Dr. Zamani Saul, het gesê dat die terugbesorging van die oorskot ’n daad van repatriasie én genesing is.
“Ware versoening vereis geregtigheid. Dit vereis die terugbesorging van wat geneem is, of dit nou oorskot, grond of waardigheid is,” het hy benadruk.
Die oorskot sal op 16 Desember 2025 in Steinkopf, Namakwaland, ter ruste gelê word, ’n simboliese daad wat eeue van ontworteling en verlies afsluit, en die nalatenskap van die eerste volke van Suid-Afrika met eer herstel.
Verklaring van die Namakwa Distriksmunisipaliteit
Die Namakwa Distriksmunisipaliteit het met trots aangeluit by die mense van die Noord-Kaap en Suid-Afrika om die terugkeer van die voorvaderlike menslike oorskot van die Khoi- en San-mense uit Skotland te herdenk.
Hierdie historiese repatriasie is ’n belangrike mylpaal in die kollektiewe reis om die waardigheid, identiteit en erfenis van die land se eerste volke te herstel.
Dit staan as ’n kragtige daad van herinnering en respek en bevestig verbintenis tot die eerbiediging van hul kulturele nalatenskap en menslikheid.
Die Munisipaliteit betuig sy opregte dank aan President Cyril Ramaphosa, die Minister van Sport, Kuns en Kultuur, mnr. Gayton McKenzie, die LUR vir Sport, Kuns en Kultuur, mnr. Mangaliso Matika, en alle belanghebbendes wat bygedra het tot die suksesvolle terugkeer van die voorouers na hul regmatige vaderland.
Die Namakwa Distriksmunisipaliteit bly standvastig in die ondersteuning van inisiatiewe wat die ryk erfenis van die Khoi- en San-gemeenskappe vier en bewaar en verseker dat hul stories toekomstige geslagte sal inspireer.
