Met trots en dankbaarheid maak die SA van Wyk sy matriekprestasie bekend, ’n duidelike bewys dat harde werk, volgehoue toewyding en samewerking vrugte afwerp.
In 2023 het die skool ’n slaagsyfer van 63,6% behaal.
Hierdie syfer het in 2024 merkbaar verbeter na 78,9%, en in 2025 is nóg ’n mylpaal bereik met ’n indrukwekkende 84% slaagsyfer.
Hierdie volgehoue groei is nie toevallig nie.
Dit is die resultaat van doelgerigte leiding, toegewyde onderwysers en leerders wat geweier het om met minder as hul beste tevrede te wees.
Die uitslae wys onmiskenbaar dat die skool sterker word.
Jaar na jaar word daar gebou aan ’n kultuur van uitnemendheid, dissipline en geloof in leerders se potensiaal.
“Ons spog nie uit arrogansie nie, maar uit trots op ’n gemeenskap wat saam gestaan het, saam geglo het en saam oorwin het,” lui die skool se boodskap.
