Nog 10 begunstigdes van die Concordia 29-behuisingsprojek het hul huissleutels ontvang tydens ’n amptelike oorhandiging in die Namakwa-distrik.
Die LUR vir Samewerkende Regering, Menslike Nedersettings en Tradisionele Sake in die Noord-Kaap, Bentley Vass, het saam met plaaslike leiers die sleutels oorhandig as deel van die projek wat deel vorm van ’n groter provinsiale behuisingsinisiatief.
Volgens Vass is dit die tweede groep huise wat in Concordia oorhandig word, ná ’n vorige oorhandiging in Desember verlede jaar. Hy sê die departement mik daarna om die tempo van bouwerk te versnel sonder om kwaliteit in te boet, met die doel om projekte regoor die provinsie teen die einde van 2026 te voltooi.
Hoewel die huise struktureel voltooi is, is dienste soos riool en elektrisiteit nog nie ten volle afgehandel nie. Die departement sê huise word reeds oorhandig om begunstigdes in staat te stel om hul eiendom te beskerm teen moontlike vandalisme terwyl werk voortgaan.
Plaaslike raadslid Charlotte Visser het die oorhandiging as ’n belangrike stap beskryf wat bydra tot menswaardigheid, maar het ook daarop gewys dat die behoefte aan behuising in die gebied steeds groot bly.
