Matrikulante van Hoërskool Concordia het Dinsdagoggend, 28 April 2026 die geleentheid gehad om die Direkteur-generaal van Basiese Onderwys, mnr. Matanzima Hubert Mweli, tydens ’n besoek aan die distrik te ontmoet.
Hy het verskeie skole besoek en is vergesel deur amptenare van die plaaslike onderwyskantoor.
Mnr. Mweli het leerders met groot entoesiasme toegespreek en hulle aangemoedig om hard te werk en gefokus te bly sodat almal die matriekjaar suksesvol kan voltooi.
Hy het beklemtoon dat dissipline, toewyding en volgehoue inspanning die sleutel tot akademiese sukses is.
Tydens sy motiveringsboodskap het hy praktiese wenke met leerders gedeel om hul kanse op sukses te verbeter.
Hy het matrikulante aangeraai om elke dag skool by te woon, betyds te wees en elke klas by te woon.
Verder het hy hulle aangemoedig om noukeurig aandag te gee aan onderwysers se lesse, hul persoonlike studieroosters getrou te volg en daagliks van beskikbare studiemateriaal gebruik te maak.
Hy het ook die belangrikheid van wedersydse ondersteuning onder leerders beklemtoon en gesê dat hulle mekaar moet help en aanmoedig om saam sukses te behaal.
Die skool se hoofdogter, Tyrelle van Rooi, het namens die leerders en personeel dank uitgespreek vir die besoek en die bemoedigende boodskap wat met die matrikulante gedeel is.
