Die Noord-Kaapse LUR vir Sport, Kuns en Kultuur, Mangaliso Matika, het die afgelope twee dae ‘n reeks strategiese vergaderings met internasionale en humanitêre vennote in Kaapstad gevoer om samewerking te versterk wat die ontwikkeling van die Noord-Kaap kan bevorder.
Die besoek is namens die Premier van die Noord-Kaap, dr. Zamani Saul, onderneem as deel van die provinsiale regering se voortgesette program om strategiese vennootskappe uit te brei.
Matika het sy besoek begin met ‘n ontmoeting met die Konsul-generaal van die Volksrepubliek China, Ren Faqiang.
Tydens die vergadering het hy waardering uitgespreek vir die bestaande samewerking tussen die Noord-Kaapse Departement van Sport, Kuns en Kultuur en die Chinese Konsulaat.
Volgens Matika het vorige gesamentlike projekte reeds ‘n positiewe bydrae gelewer tot programme wat kwesbare gemeenskappe in die provinsie ondersteun.
Beide partye het hul verbintenis herbevestig om die vennootskap verder uit te bou en nuwe geleenthede vir samewerking te ondersoek wat tot voordeel van die inwoners van die Noord-Kaap sal wees.
Matika het ook met die Konsul-generaal van die Republiek van Turkye, Yonca Sunel, vergader.
Besprekings het gefokus op moontlike samewerking in die bewaring en bevordering van die provinsie se erfenis.
Dit sluit onder meer museumontwikkeling, die digitalisering van erfenisversamelings en die versterking van argiefdienste in.
Nog ‘n belangrike vergadering was met die stigter en hoof van die Gift of the Givers-stigting, dr. Imtiaz Sooliman.
Die gesprek het gehandel oor ‘n voorstel vir ondersteuning met die ontwikkeling van ‘n kunsmatige sportfasiliteit in die Noord-Kaap.
Volgens die departement is die doel van die voorgestelde vennootskap om toegang tot gehalte-sportinfrastruktuur uit te brei, geleenthede vir atleetontwikkeling te skep en deelname aan sport, veral in minderbevoorregte gemeenskappe, te bevorder.
Matika het gesê strategiese vennootskappe speel ‘n sleutelrol in die bereiking van die departement se visie van “‘n Aktiewe en Kreatiewe Samelewing deur Sport, Kuns en Kultuur”.
Hy het bygevoeg dat samewerking met internasionale vennote en humanitêre organisasies nuwe geleenthede vir belegging, vaardigheidsoordrag, innovasie, kulturele uitruiling en volhoubare gemeenskapsontwikkeling skep.
Die gesprekke is volgens die departement in ‘n positiewe gees gevoer, met alle rolspelers wat hul verbintenis bevestig het om die dialoog voort te sit en nuwe samewerkingsgeleenthede te ondersoek wat die Noord-Kaap se ontwikkelingsdoelwitte sal ondersteun.
Die Noord-Kaapse Departement van Sport, Kuns en Kultuur sê hy bly daartoe verbind om saam met plaaslike, nasionale en internasionale vennote te werk om programme te ontwikkel wat sport bevorder, die provinsie se erfenis bewaar, kulture vier en die welstand van gemeenskappe verbeter.
