Lede van die Portefeuljekomitee oor Basiese Onderwys het aanbeveel dat leerlinge wat nie vertroud is met Afrikaans nie, by skole in die Springbok-omgewing geakkommodeer moet word, ten spyte van die feit dat Afrikaans die meerderheidsonderrigtaal in die Namakwa-distrik is.
Die komitee het Maandag (07/10/2024) Hoërskool Nababeep, Matjieskloof Intermediêr, en Hoërskool Kharkams besoek om die toestand van die skole en hulle gereedheid vir die komende Nasionale Senior Sertifikaat-eksamen (NSS) te evalueer.
Hulle het ook die infrastruktuur van die skole ondersoek, insluitend putlatrines, toegang tot water, onveilige strukture, IKT-integrasie, leerder-onderwyser-ondersteuningsmateriaal, voeding, leerdervervoer, spesiale skoleondersteuning, en inklusiewe onderwys.
Die voorsitter van die komitee, Joy Maimela, het gesê daar moet planne in plek gestel word om te verseker dat kinders wat nie Afrikaans verstaan nie, nie uitgesluit word van toegang tot onderwys nie. Sy het opgemerk dat sommige van die goed versorgde en skoon skole wat hulle besoek het, “hul begrotings rek”.
Maimela het kommer uitgespreek oor die gebrek aan behoorlike laboratoriums of rekenaarkamers met die nodige hulpbronne in sommige skole. “Dit is gehoor dat daardie hulpbronne, insluitend tablette, ‘n paar jaar gelede gesteel is. Dit is ook opgemerk dat die infrastruktuur en koshuise oor die algemeen nie goed onderhou word nie. Hierdie toestande is kommerwekkend en moet aangespreek word.”
Sy het verder gesê dat die kwintielstelsels in sommige skole heroorweeg moet word. “Jy kan nie ‘n kwintiel 4- of kwintiel 5-skool in arm gemeenskappe hê nie, want dit diskwalifiseer hulle vir subsidies wat hulle behoort te kry. Geen kind moet op grond van armoede benadeel word nie,” het sy gesê.
