Lede van die Calvinia-polisie het beslag gelê op ‘n groot hoeveelheid mandrax-tablette nadat hulle op intelligensie oor ‘n voertuig gereageer het wat vermoedelik dwelms na Calvinia vervoer het.
Volgens die SAPD is ‘n taxi deursoek nadat inligting ontvang is oor moontlike dwelmvervoer. Tydens die operasie het beamptes ‘n pakkie met mandrax-tablette ontdek. Die dwelms het ‘n beraamde straatwaarde van sowat R50 000.
Die tablette was volgens die polisie bestem vir verspreiding in die Calvinia-omgewing. ‘n Ondersoekdossier is geopen en verdere ondersoeke is aan die gang om die oorsprong en bestemming van die dwelms vas te stel.
Die Namakwa-distrikskommissaris, Brigadier Schalk Andrews, het die publiek geloof vir hul waaksaamheid en gesê die onderskepping toon die waarde van samewerking tussen gemeenskappe en die polisie in die bekamping van dwelmhandel.
Die SAPD doen ‘n beroep op enigeen met inligting oor dwelmverwante misdaad om dit aan die polisie te rapporteer. Alle inligting sal vertroulik hanteer word.
