Die Noord-Kaapse Premier, dr. Zamani Saul, het saam met die LUR vir Vervoer, Veiligheid en Skakeling, me. Limakatso Koloi, en die Provinsiale Kommissaris, luitenant-generaal Koliswa Otola, Maandag, 15 Junie 2026 die misdaadstatistieke vir die vierde kwartaal van die 2025/26-boekjaar by die Kantoor van die Premier in Kimberley bekend gemaak.
Die statistieke, wat die tydperk van Januarie tot Maart 2026 dek, toon ‘n afname in verskeie ernstige misdaadkategorieë regoor die provinsie.
Volgens die SAPD het die 17 gemeenskapsgerapporteerde ernstige misdade met 291 gevalle, oftewel 2,6%, afgeneem in vergelyking met dieselfde tydperk van die vorige finansiële jaar.
Luitenant-generaal Otola het gesê die afname is die gevolg van die toegewyde werk van polisielede, sowel as die samewerking tussen die SAPD, gemeenskappe en ander belanghebbendes.
Sy het daarop gewys dat kontakmisdade met 416 gevalle afgeneem het, met beduidende dalings in moord, seksuele oortredings, aanranding met die doel om ernstig te beseer, gewone aanranding, gewone roof en roof met verswarende omstandighede.
Volgens die statistieke het moorde met 35 gevalle afgeneem, terwyl seksuele oortredings met 106 gevalle gedaal het.
Gewone aanranding het met 163 gevalle afgeneem en roof met verswarende omstandighede met 83 gevalle.
Die enigste kontakmisdaad wat ‘n toename getoon het, was poging tot moord.
Op distriksvlak het Namakwa die grootste afname in ernstige misdaad aangeteken met 6,8%, gevolg deur Pixley ka Seme met 6,4% en Frances Baard met 2,7%.
Die JT Gaetsewe-distrik het egter ‘n toename van 0,7% aangeteken, terwyl ZF Mgcawu ‘n geringe styging van 0,2% getoon het.
Die SAPD het ook ‘n toename van 16,3% in misdade wat as gevolg van polisie-optrede opgespoor is, gerapporteer.
Dit verteenwoordig 147 meer sake as in dieselfde tydperk die vorige jaar en word beskou as ‘n aanduiding dat polisiebewerkings en ontplooiings positiewe resultate lewer.
In die stryd teen alkoholverwante misdaad het die SAPD sy optrede verskerp en daarin geslaag om 265 onwettige drankwinkels regoor die provinsie te sluit.
Die polisie glo dat die bekamping van alkoholmisbruik ‘n belangrike rol speel in die vermindering van geweldsmisdaad.
Ten spyte van die algemene afname in ernstige misdaad het die SAPD kommer uitgespreek oor die voortgesette geweld teen vroue en kinders.
Gedurende die verslagtydperk is 18 vroue en ses kinders in die provinsie vermoor.
Die statistieke toon verder dat die meeste moorde in wonings plaasgevind het, waar slagoffers en oortreders mekaar geken het.
Openbare ruimtes soos strate, oop velde en parke was die tweede mees algemene plekke waar moorde gepleeg is.
Verkragtingsake het met 27,2% afgeneem, met 220 gevalle wat aangemeld is vergeleke met 302 in dieselfde tydperk van 2025.
Pixley ka Seme was die enigste distrik wat ‘n toename in verkragtingsake aangeteken het.
Die provinsiale regering en die SAPD het die verbeterings verwelkom, maar beklemtoon dat verdere samewerking tussen wetstoepassingsagentskappe, gemeenskappe en ander rolspelers noodsaaklik bly om misdaad verder te verminder en die veiligheid van inwoners van die Noord-Kaap te verseker.
