’n Noord-Kapenaar wat in Upington met ’n pangolienvel betrap is, is tot ’n boete van R50 000 gevonnis.
Luitenant-kolonel Tebogo Thebe, woordvoerder van die Valke, het gesê Zandray Dawids (40) is in Januarie 2021 in hegtenis geneem nadat hy met pangolienvel by ‘n vragmotorstop op die N14-pad in Upington gevind is.
“Dawids is aangekla van die besit van ‘n bedreigde spesie, vervoer en handeldryf in bedreigde spesies en geldwassery,” het Thebe gesê.
Die Upington-streekhof het Dawids soos volg gevonnis: “Op die hoofaanklag van die besit van bedreigde spesies het die hof ‘n boete van R50 000 opgelê. Vervoer en handel in bedreigde spesies, gevonnis tot vyf jaar gevangenisstraf, opgeskort vir vyf jaar. Op die laaste aanklag van geldwassery is die beskuldigde tot vyf jaar gevangenisstraf gevonnis en ook vir vyf jaar opgeskort.”
Thebe het bygevoeg dat die hof Dawids skuldig bevind en gevonnis het nadat hy en die staat ‘n artikel 105A-pleit suksesvol beding het.
Volgens die Wêreldnatuurfonds (WWF) is pangoline die soogdier wat die meeste verhandel word ter wêreld.
Die agt spesies pangoline, vier in Afrika en vier in Asië, word bedreig.
“Oor die afgelope dekade is meer as ‘n miljoen pangoliene onwettig uit die natuur geneem om die vraag in China en Viëtnam te voed.
“Hulle vleis word as ‘n lekkerny beskou, terwyl hul skubbe in tradisionele Chinese medisyne gebruik word, aangesien dit glo ‘n reeks kwale behandel, van asma tot rumatiek en artritis,” het die WWF gesê.
Volgens die Internasionale Unie vir Natuurbewaring (IUCN) word twee van die Afrika-spesies pangoline as kwesbaar beskou en twee word bedreig.
Van die Asiatiese spesies is een bedreig terwyl die ander drie kritiek bedreig is.
