ie “Meet and Greet”-projek, ‘n samewerkingsinisiatief tussen die Suid-Afrikaanse Polisiediens (SAPD) en Radio NFM, toon toenemende impak en betrokkenheid in die Namakwa-distrik.
Op Woensdag, 16 Julie, het Luitenant-Kolonel Debbie Abrahams-Willemse, stasiebevelvoerder van Pofadder SAPD, as die vyfde bevelvoerder aan die program deelgeneem. Die weeklikse program, wat elke Woensdag tussen 15:00 en 16:00 uitgesaai word, bied gemeenskappe die geleentheid om eerstehands kennis te maak met hul plaaslike polisiebestuur.
Die inisiatief het ten doel om gemeenskapsvertroue in die SAPD te versterk, vennootskapspolisiëring te bevorder en dienslewering te verbeter. ‘n Klagtebus is nou by die kantore van Radio NFM geplaas, wat die publiek in staat stel om hul bekommernisse te deel. Hierdie klagtes word direk hanteer deur Brigadier Schalk Andrews en Kaptein Magerman, en verwys na die toepaslike stasie of eenheid vir opvolg.
Verder is ’n SAPD/NFM-polisielessenaar ingestel waar inwoners ook via WhatsApp insette kan gee – van klagtes tot goeie praktyke – in ‘n poging om ‘n inklusiewe en samewerkende misdaadbekampingsmodel te vestig.
Die projek, wat as ‘n “sak van uitnemendheid” beskryf word, het wye ondersteuning van inwoners ontvang. Deur groter insig en betrokkenheid, voel die gemeenskap nou meer deel van die stryd teen misdaad regoor Namakwa.
