Die Namakwa-distriksbestuur van die Suid- Afrikaanse Polisiediens verwelkom die vonnisoplegging van Kelebogile Sesing (39) ná die noodlottige messteek op haar eks-kêrel.
Op 5 Desember 2021 in Onseepkans was die beskuldigde en haar eks-kêrel, Vincent Legalamitlwa (35), in ‘n rusie betrokke oor ‘n sak klere.
“Daar word beweer dat die beskuldigde ‘n mes uit die kombuis gaan haal en die oorledene daarmee gekonfronteer het. ‘n Onderonsie het ontstaan en die oorledene het die beskuldigde met ‘n staalkabel geslaan, het polisiewoordvoerder kolonel Cherelle Ehlers gesê.
Sy het toe wraak geneem en hom gesteek.
Die beskuldigde, wat ‘n 5 maande oue baba het, is skuldig bevind aan moord met Dolus Eventualis soos gelees met Artikel 51 (1) CLAA 105 van 1997.
Sy is op 10 November 2023 in die Pofadder-streekhof tot 12 jaar gevangenisstraf gevonnis.
Die Namakwa-distrikskommissaris, brigadier Schalk Andrews het die ondersoekbeampte, speur-adjudant offisier Christoffel Bekker, geloof vir ‘n deeglike ondersoek en die verkryging van ‘n skuldigbevinding.
Hy het verklaar dat pogings versterk sal word om gesinsgeweld en GBV-verwante misdade aan te spreek tydens die 16 Dae van Aktivisme vir geen geweld teen vroue en kinders en verder nie.
