Die Premier van die Noord-Kaap, dr. Zamani Saul, het gisteraand saam met die LUR vir Onderwys die Meerjarige Onderwysverbeteringsplan 2035 bekendgestel.
’n Strategiese mylpaal wat daarop gemik is om die doeltreffende benutting van beskikbare hulpbronne te bevorder en sistemiese verbetering binne die onderwyssektor te dryf.
Volgens dr. Saul bied die plan ’n duidelike padkaart vir samewerking tussen die regering, vennote en belanghebbendes om onderwyskwaliteit en leerderprestasie oor die provinsie heen te versterk.
“Wanneer samelewings kinders van sterk fondamente voorsien om gesonde en produktiewe lewens te bou, verseker dit die toekomstige voorspoed en welstand van almal,” het hy gesê.
Die plan beklemtoon streng verslagdoening, monitering en aanspreeklikheid om te verseker dat elke bydrae meetbare verbeterings lewer in onderrigleierskap, klaskamerpraktyke en leerderondersteuning.
Die Noord-Kaapse Provinsiale Regering sê dit is vol vertroue dat hierdie geïntegreerde benadering tot onderwysontwikkeling uiteindelik sal lei tot duursame en betekenisvolle resultate in die provinsie se onderwysstelsel.
