Die waarnemende premier van die Noord-Kaap, mnr. Bentley Vass, het Maandag (25/11/2024) die 16 Dae van Aktivisme vir Geen Geweld Teen Vroue en Kinders by die Middelpos-gemeenskapsaal in die Hantam Plaaslike Munisipaliteit in die Namakwa-distrik amptelik geloods.
Hierdie veldtog, wat tot 10 Desember sal duur, word vanjaar gevier onder die tema:
“30 jaar van bevordering van kollektiewe aksie om geweld teen vroue en kinders te beëindig.”
Hierdie internasionale veldtog, wat deur die Verenigde Nasies ondersteun word, is daarop gemik om die werklikheid van geweld teen vroue en kinders te beklemtoon en gemeenskappe aan te moedig om proaktiewe stappe te neem om dit te voorkom.
In sy toespraak het mnr. Vass beklemtoon dat geslagsgebaseerde geweld nie net individuele slagoffers raak nie, maar ook gemeenskappe en die samelewing in geheel.
Hy het ‘n beroep op almal gedoen om betrokke te raak, te praat en te help om veilige omgewings vir vroue en kinders te skep.
Tydens hierdie veldtog sal ‘n reeks aktiwiteite regoor die provinsie plaasvind, insluitend bewusmakingsessies, gemeenskapsbetrokkenheid, en opvoedkundige programme.
Hierdie aktiwiteite is daarop gemik om die samelewing te bemagtig om die stilte rondom geweld te breek en op te staan vir die regte van vroue en kinders.
Die veldtog is ‘n jaarlikse herinnering aan die gesamentlike verantwoordelikheid van regerings, organisasies, en individue om geslagsgebaseerde geweld te beveg en ‘n toekoms sonder vrees te bou.
