Vyf mans is onlangs in Kimberley in hegtenis geneem weens die oortreding van die immigrasiewet tydens ‘n gesamentlike operasie deur die SA Polisiediens en die SA Nasionale Weermag.
Die aksie het op 19 September in die Kenilworth-informele nedersetting plaasgevind, waar ‘n groep mense by ‘n woning bymekaargekom het.
By die ondersoek is ontdek dat die 53-jarige huiseienaar ‘n onwettige shebeen bedryf het. Owerhede het op alkohol beslag gelê en ‘n boete aan die eienaar uitgereik.
Die vyf mans, wat vermoedelik onwettig in die land woon, is aan immigrasiebeamptes oorhandig vir verdere verwerking.
Merapelo Pilane, ‘n woordvoerder van die polisie, het bevestig dat die Operasie Vala Umgodi-span sal voortgaan om prioriteitsmisdade in die Frances Baard-distrik aan te spreek.
