Die polisie in Nababeep het ’n ondersoek na strafbare manslag van stapel gestuur nadat ’n 34-jarige voetganger Saterdag noodlottig beseer is in ’n motorvoertuigongeluk in Vaalhoek, Okiep.
Volgens ’n verklaring van die kantoor van die Namakwa-distrikskommissaris het die voorval op 17 Mei 2025 omstreeks 11:30 plaasgevind. ’n Voertuig het na bewering die man getref terwyl hy te voet in die gebied beweeg het.
Die 37-jarige bestuurder, wat ten tyde van die voorval saam met ’n vroulike passasier in die voertuig was, het homself later by die Springbok-polisiekantoor aangemeld. Hy is daar in hegtenis geneem.
Polisiewoordvoerder, Kaptein Ivan Magerman het bevestig dat ’n saak van strafbare manslag tans ondersoek word. Die omstandighede rondom die voorval word steeds nagegaan, en die ondersoek duur voort.
Die identiteit van die oorledene is nog nie bekend gemaak nie.
Die polisie doen ’n beroep op enige lede van die publiek wat moontlik die voorval gesien het, om na vore te kom met inligting wat kan help met die ondersoek.
