‘n Groot deel van Galeshewe het ‘n kragonderbreking ondervind wat daartoe gelei het tot die vermoede van sabotasie nadat ‘n groot aantal inwoners ‘n betoging gelei het – ironies genoeg omdat die Sol Plaatje-munisipaliteit die elektrisiteit van sommige huishoudings versper het.
Inwoners van Phomolong-plakkershutte en Phutanang het vroegoggend in twee afsonderlike betogings die strate ingevaar en groot paaie in die gebied versper.
Die R31-pad naby Phutanang- en John Dakaweg in Galeshewe is met brandende bande, klippe en rommel versper toe inwoners in twee groepe opverdeel was om die strate vanaf 05:00 te versper.
Gestrande motoriste het lang vertragings op die R31 ondervind, terwyl ander alternatiewe roetes gesoek het om hul bestemmings te bereik.
Die betogers se eise om met die uitvoerende burgemeester van Sol Plaatje te praat, is nagekom toe hy met hulle aangesig tot aangesig ontmoet het.
Terwyl Sonyoni met die betogers in gesprek getree het, het EPWP-werkers die paaie skoongemaak en die munisipaliteit se elektriese span het gewerk om krag na die betrokkenes te herstel.
Thabo Mothibi, munisipale woordvoerder, het gesê die Kutlwanong-substasie moet geïsoleer word om krag na ander gebiede te herstel.
“Die Sol Plaatje-munisipaliteit se elektriese afdeling het kragtoevoer na groot dele van Galeshewe herstel te midde van vanoggend se wydverspreide kragonderbreking,” het Mothibi verduidelik.
“‘n Inspeksie moet gedoen word om die bron van die kragonderbrekings te bepaal, aangesien Club 2000, Soul City en ‘n gedeelte van Donkerhoek van lyn bly.”
Keba Mususe, burgemeesterswoordvoerder, het bevestig dat die burgemeester die betogers aangemoedig het om die munisipaliteit te besoek om reëlings vir hul agterstallige rekeninge te tref.
