Tyreeq Engelbrecht van Springbok maak vordering in die hernubare energiesektor deur ‘n internskapprogram by Kangnas Windplaas.
Hierdie geleentheid is deel van ‘n breër inisiatief wat daarop gemik is om vaardighede te ontwikkel wat noodsaaklik is vir die groeiende hernubare energiebedryf en nasionale ekonomiese vooruitgang, terwyl dit ook plaaslike jeug ontwikkel.
Engelbrecht, ’n uitblinker van die windplaas se Beyond Matric-program, doen nou onskatbare ervaring op onder leiding van aanlegbestuurder Brenda Sidaki, wie se fokus op verskeie operasionele aspekte van windplaasbestuur is.
As ‘n operasionele aanleg-intern by die windplaas, sal hy verskeie verantwoordelikhede onderneem, insluitend veiligheid, gesondheid, omgewing en kwaliteit (SHEQ) bestuur; monitering van tegniese prestasie; finansies, kontrakte en bestuurstake; en administrasie pligte.
Die ekonomiese ontwikkelingsbestuurder van Kangnas Windplaas, Rouchet Daniels, het gesê die inisiatief stel interns in staat om met ervare mense te netwerk en hul vaardighede op te skerp voordat hulle die arbeidsmag betree.
“Dit help hierdie jongmense om hul passie te vind, bedryfservaring op te doen en hul CV’s ’n hupstoot te gee.
“Namate die windenergiesektor groei, sal meer geleenthede ontstaan, wat voorbereide en gekwalifiseerde jong professionele persone vereis,” het Daniels gesê.
Engelbrecht het gesê die hoogtepunt van die opleiding was die fokus op leierskapsvaardighede, wat hom geïnspireer het om beheer oor sy toekoms te neem.
“Met die ondersteuning van die aanlegbestuurder en span, hoop ek om uit te blink in my doelwitte en om uiteindelik my werkplekmodules te voltooi wat my in staat sal stel om my rooiseëlsertifikaat en diploma in elektriese ingenieurswese te verwerf.
“As ek vorentoe kyk, is ek gretig om ’n loopbaan in hernubare energie te volg,” het Engelbrecht gesê.
Engelbrecht was een van 15 deelnemers aan Kangnas Wind Farm se Beyond Matric-program, wat ontwerp is om vaardigheidsontwikkeling en ondersteuning aan werklose jeugdiges te bied.
Die program, wat oor agt maande strek, het opleiding in verskeie noodsaaklike areas gebied, insluitend werkgereedheid, professionele CV-skryf, onderhoudvoeringvaardighede, leierskap en rekenaargeletterdheid.
