President Cyril Ramaphosa het aangekondig dat Suid-Afrika op 29 Mei 2024 na die stembus gaan vir die Algemene Nasionale en Provinsiale Verkiesing.
In ‘n verklaring wat Dinsdagaand (21 Februarie 2024) vrygestel is, het die Presidensie gesê dat president Ramaphosa in ooreenstemming met artikel 17(2) van die Verkiesingswet 73 van 1998 met die Onafhanklike Verkiesingskommissie (OVK) oor die verkiesingsdatum gekonsulteer het.
Hy het verder ‘n vergadering met al nege Provinsiale Premiers en die OVK belê om die stand van gereedheid vir die Algemene Verkiesing te bespreek.
“President Cyril Ramaphosa het, ooreenkomstig artikel 49(2) van die Grondwet van die Republiek van Suid-Afrika, saamgelees met artikel 17 van die Kieswet van 1998, bepaal 29 Mei 2024 as die datum vir die 2024 Algemene Nasionale en Provinsiale Verkiesing,” het die Presidensie gesê.
Die 2024-verkiesing val saam met Suid-Afrika se viering van 30 jaar van vryheid en demokrasie.
Daarom het president Ramaphosa ‘n beroep op alle stemgeregtigde kiesers gedoen om ten volle deel te neem aan hierdie belangrike en geskiedkundige mylpaal op die demokratiese kalender.
“Behalwe vir die nakoming van ons grondwetlike verpligting, is hierdie komende verkiesings ook ‘n viering van ons demokratiese reis en ‘n bepaling van die toekoms wat ons almal begeer. Ek doen ‘n beroep op alle Suid-Afrikaners om hul demokratiese reg om te stem uit te oefen en vir diegene wat hul veldtog gaan voer om dit vreedsaam te doen, binne die volle nakoming van die wet. Ons doen ook ‘n beroep op ongeregistreerde kiesers om die aanlyn registrasieplatform te gebruik om te registreer,” het president Ramaphosa gesê.
Die Presidensie het gesê die proklamasie om die datum te verklaar sal mettertyd uitgereik word. – SAnews.gov.za
